0

Rakhi Wale Bhagwan Ji

Like & ShareShare on FacebookTweet about this on TwitterEmail this to someoneShare on Google+Digg thisShare on LinkedInPin on PinterestShare on TumblrShare on StumbleUponPrint this page

Lata apni maa ke paas aakar boli, “Maa, maa, parson Raksha Bandhan hai. Main kisey Rakhi bandhoongi?”
Har saal Sudha ko apni beti ke iss sawal ka koi na koi jawab dena padta tha. “Abhi Rakhi main do din hain. Bhagwan ji kisi na kisi ko zaroor bhej denge, dekh lena,” Sudha ne Lata ko godh main uthate hue hass kar kahan.

Sudha ki chaar saal ki beti ne rooth kar kaha, “aap har baar yahi kehti ho maa par koi nahi aata. Sab apne bhai ko rakhi bandhte hain, mujhe bhi bandhna hai,” kehte hue Lata rone lagi. Sudha ne fridge se chocolate nikaal kar Lata ko dena chaha. “Mujhe nahi chahiye,” kehkar Lata ne apni gudiya uthaye aur apne kamre main chali gaye.

Sudha khana banane main lag gayi, lekin Lata ne khana bhi dhang se nahi khaya jab ki uske pasand ki bhindi ki subzi bani thi. Iss shehar main koi naate rishteydaar bhi nahi they jinke ghar Lata ko le jakar ya unhe bula kar Rakhi bandhwayee jaye.

Raat main jab Lata ghehre neend main doob gaye, Sudha ne apne pati Suresh se kaha, “Lata bahut udaas lag rahi hai. Har saal, Rakhi ke as paas yunhi udaas ho jati hai. Main bhi usey dilaasa dilate dilate haar gaye hoon.” “Eshwar bada dayalu hai. Uspe apna vishwas aur bharosa banaye rakho,” Suresh ne karvat badalte hue kaha.

Agle din, savere ke naashte ke baad, Sudha khane ki mez samet rahi thi. Tabhi, darwaze ki ghanti baji. Suresh ne darwaza khola aur kaha, “Arey Uma, itne dino baad, aao aao andar to aao. Sudha dekho tumhari saheli Uma aaye hai.”

Uma akeli nahi thi. Uske saath uska teen saal ka beta Uday bhi tha.

Sudha ne baithak main pravesh kiya aur Uma ko gale lagate hue poocha, “Tum hamare sheher kab aaye? Tumhare pati Rajeev saath nahi aaye? Achcha pahle baitho main paani laati hoon. Arey Uday, tum kitne bade ho gaye ho. Chocolate khaoge?” Yeh kehte hue Sudha kitchen main gaye.

Uma ko paani aur Uday ko chocolate dete hue Sudha na kaha, “Haan batao Uma, kya baat hai? Tum thodi pareshaan lag rahi ho.” “Mere pati do saal se videsh main hain. Iss saal unka tabadla tumhare hi sheher main hua hai. Wah aane wale they ki achanak unki tabiyat kharab ho gaye hai. Mujhe fauran bulaya hai. Unke theek hote hi hum dono tumhare pados main hi ek flat lekar rehna chahte hai. Yahan se Rajeev ka office bhi paas padega. Mera jaana bahut jaldi main teh hua hai isliye main Uday ko saath nahi le jaa sakti. Kya tum kuch dino ke liye Uday ko apne paas rakh logi?”

“Arey kyun nahi. Tum meri sabse pyaari saheli ho. Aakhir yeh ghar bhi to tumhara hi hai. Uday, hamare saath rahoge? Mummy papa ko lekar jaldi aa jayegi,” Sudha ne Uday ko godh main bithate hue poocha.

Uday ne muskurate hue haan kaha. Uma ne Sudha ko ek handbag diya aur kaha, “Isme Uday ke kuch kapde aur khilone hain. Mujhe aaj raat hi nikalna hai.”

Usi samay, Lata neend se uth kar baithak main aaye. Sudha ne kaha, “Dekho Lata, bhagwan ji ne tumhare liye ek bhaiya bheja hai. Kal tum Uday ko rakhi baandhna.” Rakhi ki subah, Lata kuch jaldi hi uth gaye. Uday ke uthne par usne Rakhi ki thaali maa se maangi aur Uday ko kursi par baithate hue uske maathe par tilak lagaya.

“Maa aapne theek kahan tha. Rakhi wale bhagwan ji ne mere paas bhai bhej diya. Ab main har saal Uday bhaiya ko rakhi bandhongi,” Lata ne Uday ko laddoo khilate hue kaha.

Written By: Amita  is a Story teller and a spiritual writer. To share your feedback, write to her at amita17149@hotmail.com, or leave a comment below.

WritersHideout

Leave a Reply

Your email address will not be published. Required fields are marked *

Help us to reduce SPAM. Please confirm you are Human. *